Matthew 24

Taaꞌniꞌantananka Doong Asiꞌkoong

(Mak 13:1-13; Luk 21:5-19)

1Teketa Jiisuuꞌ dootuuꞌnava pankava-ita siarara tenkenuko bakaning barevare-nupoong tee-anko porouꞌ avatevaronanka-koo nau-antavaavaꞌnaang. 2Jiisuuꞌke aaꞌpuruꞌ teing, “Aing kapooꞌnanka diiꞌke ee ooverimang? Masikaꞌ naurampimang, teing aing kapananka teing tuurampaavaining. Teinge piatooroi deroaama nareꞌ niiꞌnareꞌkoo daue panteꞌarioꞌ sipaavaukaꞌ.”

3Teketa Jiisuuꞌ teke Oliveꞌpoꞌnamii-koo baka baꞌnanuioꞌ bakaning barevare-nupoong tee-anko porora biiꞌka otoroi niaꞌaama aaꞌpauꞌ, “Naumeriai tee areꞌmoong teeꞌ nkoaravaing, eeꞌnoko taaꞌniꞌanta aming daꞌ poaing-koong, eeꞌnoko aung batei oparavaing-koong taaꞌniꞌanta aminge?”

4Teketa Jiisuuꞌke makuꞌurima aaꞌpuruꞌ, “Bakei, tarerariri otoriaing nantoonge poo-antaraariꞌneeng. 5Aiꞌ nantoong mmauꞌke tee poroma nkaang miring tampaama aaꞌpaavaing, ‘Ning tee eeꞌnung Kumponinge Pakoꞌpariꞌniiꞌ,’ eeꞌnoko teeꞌ nkoarima nantoong mmauꞌ tosiaariko siompaariaing. 6Eeꞌnoko diiꞌke tee karenanka tavoꞌkuko eeꞌnoko tamung minkuaako taaraveriaing, teka diiꞌ eeꞌning tarerariaing diiꞌ domang puraaniriꞌneeng tee-koo, aiꞌ teing teing kapooꞌ teeꞌ oroꞌnanka nkoaravaining, teka botu mmeꞌ basiaravaꞌ. 7Narung kansiꞌ iꞌamparama niiꞌnung kansiꞌ turampuainge. Eeꞌnoko narung muuꞌ iꞌamparama niiꞌnung muuꞌ turampuainge. Eeꞌnoko napoꞌ nantoong peera-koo booroainge, eeꞌnoko uꞌmiꞌnanka nkoaravai niiꞌning kansiꞌnanka-koo. 8Aing teing tamung tutunaꞌning sisikeerananka manikuma mantompumanaꞌ tootoꞌ pontoꞌke dueꞌuko.

9“Eeꞌnoko tenang eeꞌnang diiꞌ teing daiꞌdaarira tavoꞌdaariaining orakaꞌ nkoraariiꞌnaang, eeꞌnoko diiꞌkoo niiꞌning dupisiꞌdaariaing. Eeꞌnoko diiꞌ teing ookara nantoonge munteꞌdaariaining ning nkaang miring-poꞌnupoong deentariko. 10Eeꞌnoko tenang eeꞌnang mmauꞌ nantoong tee biikaang masikaꞌanta-ita duaꞌariaing, eeꞌnoko niiꞌninge biiꞌmaikororiꞌ munteꞌaarima tooka kompai niiꞌning kare-nupoong-koo siaariai dupisiꞌaariiꞌnaang. 11Eeꞌnoko mmauꞌ nakaro-nupoong oroꞌpariaing tenang daang Kumponing-etaining tamparima, eeꞌnoko mmauꞌ nantoong tosiaarima poo-antavaariai. 12Eeꞌnoko tenang orara aarumo beremparako mmauꞌ biikaang piaa tee kaꞌmatompuaing. 13Eeꞌnoko naning purimparioꞌ bera asiranaꞌmung basiaravaing deekoꞌ domamparavaing. 14Eeꞌnoko tee tutung tee aung doorenang tampara ookara kansiꞌkoo daankiaavaing ookara nantoonge Kumponing bakaang muuꞌkoo tumpariainaꞌ taaravaavaꞌnaang, teketa tee-koo damaꞌdue doong asiꞌ tavoꞌkuaing.”

Kapooꞌ Maarekusiꞌ Oroꞌparavainaꞌ

(Mak 13:14-23; Luk 21:20-24)

15“Eeꞌnoko tenang tee kapooꞌ maremaare ooveriaing meepoꞌke donkonuioꞌ teie nakaronunge Danieloi minkuvuuꞌnaꞌ tee teꞌ meepoꞌ nuampa-antavuaing.” (Daari Meekung-koo deeruerira tasiꞌperipeuꞌ.) 16“Tenang tee donkonuioꞌ ooaara teing aꞌ Judiaꞌnameng-koo otoroaining miinanka-koo deto bakei navoꞌka kooꞌariaing! 17Naning daunavaro-koo otoaing deekoꞌ siarara pava-koo kuung beaukaꞌ bakaang kavo nka-koo. 18Napoꞌ naning mintoong-koo otoainooꞌketa pava-koo toroaravaukaꞌ bakaang mononopaꞌ nka-koo. 19Bakei piaaruꞌnuka otoroaing teing manikuꞌ kempoꞌnuka eeꞌnoko napoꞌ teing biurukaaꞌ noonooꞌkoo otoroaining, aiꞌ teing tapotaponuka, mmariꞌkoo makotuaꞌ. 20Kunsirariaing tee aung batei mmaririainaꞌmung kamaari bakanang batei deemparavaukaꞌnaꞌ, niiꞌnooꞌ Doong Uaanaꞌmung deemparavaukaꞌ. 21Tee arikung teꞌmung tavoꞌkuaing tee bakei dau basi aung kansiꞌ tutuntoma-ita nkoaruꞌning-koo bera eꞌmung doong-koo basinooꞌkoo, eeꞌnoko napoꞌ damaꞌke teeꞌ basi otoaukaꞌnunge. 22Teing doong arikeng Kumponinge apukaꞌantavuaruko deekoꞌ ookara nantoong teing oparipeuꞌning, teka Kumponinge bakaning miruꞌnisinuka piaavurima tee batei apukaꞌantavui miruꞌuuꞌnung.

23“Eeꞌnoko tenang eeꞌnang niiꞌnung naninge aaꞌduriko deekoꞌ, ‘Ooveriai, aung tee Kumponinge Pakoꞌpariꞌniiꞌ tavoꞌkuaing-koong!’ niiꞌnooꞌ aaꞌpuko, ‘Auntang!’ tee masikaꞌantaveriaukaꞌ. 24Aiꞌ teing nakaro-nupoong eeꞌnoko pakoꞌpariꞌniiꞌnuka daang Kumponing-etaning tamparimaing porora taaꞌniꞌanta pankenanka taꞌnimpaariiꞌnaꞌ nkoaavaing nantoong tosiaarima Kumponing bakaning naroꞌka papaara-antavaariiꞌnaang, tavoꞌarapeuꞌnung-pinaꞌ. 25Ooveriko, aung tee ninge tero uroꞌkanooꞌke naurampimang. 26Teeꞌkoo naninge niiꞌnunge naururima aaꞌduriko, ‘Auntanto meeꞌboraꞌ sirakamaaꞌke otomang,’ teꞌ beriaukaꞌ. Napoꞌ aaꞌpuko deekoꞌ, ‘Aung anke kuunge otomang,’ tee masikaꞌantaveriaukaꞌ. 27Teka tee piping isipoꞌketa pipimpuma ootukunairu namuꞌke sirakaꞌpumanaꞌ teeꞌ nariꞌ ookarai oomaavaing ning Tee Naning-naumpoꞌ Paning-etaing moko. 28Areꞌ tokoo bonkuꞌ otoainooꞌ teing mareoiꞌnanka teꞌ oosiarima siraꞌpaavaing.”

Tee Naning-naumpoꞌ Paning-etaing Poainaꞌ

(Mak 13:24-31; Luk 21:25-33)

29“Tenang eeꞌnang namuꞌke mankiꞌantananka teing doong-koo tavoꞌkuaining tankinuko tee duaaꞌ tee tenang mutaanampuaing, eeꞌnoko kaara arakavaravaukaꞌ, eeꞌnoko beentoꞌnanka paning-eta tankavariai. Eeꞌnoko teing purintoꞌnanka kapooꞌ paning-kooning teing dankampuriaininge. 30Eeꞌnoko tenang eeꞌnang tee taaꞌniꞌanta Tee Naning-naumpoꞌ Paning-etaing ookara kansiꞌ tare-koo poaing-koong oroꞌparavaing teke paning-koo, eeꞌnoko nantoong ookara kansiꞌkooning tenang eeꞌnang avoreaama orarunsiariaing. Eeꞌnoko teinge ning Tee Naning-naumpoꞌ Paning-etaing taaꞌniꞌmoi moko oomaavaing, purintoꞌ ninka kamoꞌke depeto aaꞌnaꞌ meenaꞌmoi. 31Eeꞌnoko ninge tuuviri aaꞌnaꞌ karantavama~ botoarampaing teing nkaning koosinunanka, eeꞌnoko teinge oosiaariaing teing nkaning miruꞌnisinuka kansiꞌkoo ookutunairu-eta.

32“Enang tee diiꞌke tee baisirovang ooverira noruꞌeriaing, aaꞌnomaung: Tenang paraꞌ nenuvaraꞌuko noruꞌerikooꞌ teketa deto puaravuuꞌnaang dueꞌka. 33Teeꞌ nariꞌ napoꞌ diiꞌke teing aing ookara kapooꞌnanka ooverira noruꞌeriaing tee tee dueꞌ, karanaang-anko poing. 34Masikaꞌ naurampimang ninge diiꞌ, aing enanavarang mmeꞌ paaꞌariaruko nkoaravaing teing aing kapooꞌnanka ookara. 35Paning eeꞌnoko kansiꞌ teing paaꞌareaining teka nkaang kara tee paaꞌaravaukaꞌnung.”

Doong Eeꞌnoko Batei Naninge Noruꞌuaꞌ

(Mak 13:32-37; Luk 17:26-30; 17:34-36)

36“Naninge noruꞌuaꞌ tee doong eeꞌnoko tee batei. Koosinunanka paning-kooninge noruꞌaavaꞌ. Napoꞌ ninge, tee bauringe, noruꞌampaꞌ, teka teie narunge Mmaꞌke noruꞌui otong tee batei. 37Teeꞌ nariꞌ Nooaꞌ bakanang nkoaruꞌnaꞌ nkoaravaing tee ning Tee Naning-naumpoꞌ Paning-etaing moainang. 38Aaꞌnokoꞌnaꞌ: tenang batei doua pankaing mmeꞌ poaruko taamanaama, naikaama, nampeema otorokoꞌ bera Nooaꞌ aakaꞌnareng-koo tumparuꞌnaꞌmung-koo basi. 39Tee kapooꞌ nkoaravaing-koo noruꞌ otoroaꞌ bera douai pora teing ookara aaruvuruꞌ. Teeꞌ nariꞌ eeꞌnaꞌ nkoaravaing tenang ning Tee Naning-naumpoꞌ Paning-etaing moainang. 40Kenaankara naninka mintoong-koo otoreko narung tenaanka-koo pariꞌuma, narung sipuaing. 41Napoꞌ manikumaara kenaankara-koo nariꞌ iinkureko nani pariꞌuma nani sipuaing.

42“Teeꞌkoo tanatarariri otorimaatoai, aiꞌ diiꞌke tee noruꞌeriaꞌ tee diikaang Ovoring poainaꞌmung. 43Teka eeꞌ noruꞌeriaing diiꞌke, naninge pava okovenunge tee bakiaaꞌnko pomanang muunga noruꞌui dei tee tee maamuari otopeuꞌ tee bakaang pava pesiꞌkoo tauraꞌpuaꞌ. 44Teeꞌ nariꞌ diiꞌ maamurariri otoriainge, aiꞌ tee ning Tee Naning-naumpoꞌ Paning-etaing tenang batei ning moaing-pinaꞌ noruꞌmeriaruko moaing.”

Mirumiruꞌ Naninka Kenaankara Mintoomparetuꞌnaꞌkoong

(Luk 12:42-46)

45“Baa tee naning matau, bakaang ovoringe bakanava tare-koo botovumaung, naning kakeꞌiinara botovotonaaꞌnuka batei makosinang bauꞌkoo miruꞌnisi, biraanke-antavuaing tee botovotonaaꞌ bakaang ovoringe pora teeꞌ nkoarako meuꞌpura. 47Masikaꞌ naurampimang ninge, teie ookutuning kapooꞌ okovumaing-koo tarenara deeng-antavuaing. 48Teka teie botovotonaaꞌke orarai eeꞌ noruꞌuaing deekoꞌ, ‘Nkaang ovoring anaꞌaring poꞌkoo,’ eeꞌnoko tavuꞌ tutumpuriai teing niiꞌning botovotonaaꞌnuka, eeꞌnoko teing ninka nantoong naikaama kanuꞌarimaing ninka nariꞌ nkoariai, teie bakaang ovoringe poma meuꞌpuuꞌnaang doong paapaaꞌui otoainaꞌmung tee poꞌkoo, eeꞌnoko batei noruꞌuaukaꞌnang. 51Eeꞌnoko teie aaꞌnaꞌ kiimatavuaing tee, eeꞌnoko naroꞌ sipuai teing ninka ampirinunuka ninka, teꞌ eeꞌnooꞌ nantoong biromparima siꞌdaꞌ dovang kakirinkuarimatoainooꞌ sisikeera-koo otoroi.”